Një delegacion i Kryesisë së Bashkësisë Islame të Kosovës, i udhëhequr nga kryeimami i Kosovës, Vedat ef. Sahiti ka qëndruar të dielën në Medvegjë, me ç’rast vizituan banorët e saj dhe fshatrave përreth për t’u informuar për mbarëvajtjen e jetës fetare në këtë pjesë dhe në veçanti gjatë muajit Ramazan.

Kryeimami së bashku me dekanin e Fakultetit të Studimeve, Islam Hasanin, drejtorin për Veprimtari Botuese, Ramadan Shkodra dhe imamë nga Prishtina vizituan fillimisht xhaminë e fshatit Topallë, xhami kjo e cila u vlerësua në Riad për arkitekturën islame.

Kryeimami Sahiti mori pjesë më pas në iftarin tashmë tradicional që shtrohet në Medvegjë me banorët e kësaj pjese. Po në xhaminë e fshatit të Sjarinës, kryeimami Sahiti mbajti një ligjëratë për Natën e Kadrit dhe begatitë që sjellë kjo natë.

Vizitat e tilla nga Kryesia e Bashkësisë Islame të Kosovës, u çmua dhe u vlerësua edhe nga imami i xhamisë së fshatit Sjarinë dhe besimtarët atje.

Organizatorët shprehen të lumtur për organizimin e këtij iftari të përbashkët për ta fuqizuar atmosferën e Ramazanit meqenëse numri i banorëve atje është zvogëluar dukshëm.

Përfaqësues të Shoqatës Humanitare “Bereqeti” gjatë qëndrimit në Medvegjë shpërndanë pako ushqimore për rastet me gjendje të rënduar ekonomike. Po ashtu delegacioni i Kryesisë së Bashkësisë Islame të Kosovës vizituan edhe fabrikën e tekstilit, e cila është së fundmi ka kaluar në pronësi të një biznesmeni shqiptar.